រថយន្ត និងរថយន្តបុកគ្នា បណ្ដាលឲ្យបុរសម្នាក់រងរបួសធ្ងន់

ពោធិ៍សាត់៖គ្រោះថ្នាក់ចរាចរណ៍រវាងរថយន្តនិងរថយន្តបានបុកគ្នាពេញទំហឹងបណ្តាលឱ្យបុរសម្នាក់រងរបួសធ្ងន់។
ហេតុការណ៍នេះបានកើតឡើងនៅលើផ្លូវជាតិលេខ៥ក្នុងភូមិកំពែងស្វាយ ឃុំស្នាមព្រះ ស្រុកបាកាន ខេត្តពោធិ៍សាត់ កាលពីយប់ថ្ងៃទី៤ ខែកក្កដា ឆ្នាំ២០២១។
លោកវរសេនីយ៍ឯក រស់ ចំរើន ប្រធានការិយាល័យនគរបាលចរាចរណ៍ខេត្តបានឱ្យដឹងថា៖ រថយន្តមួយគ្រឿងម៉ាកហីយ៉ាន់ដាយពាក់ផ្លាកលេខកំពង់ស្ពឺ 2A-8335 ។បើកបរដោយឈ្មោះ ពេញ ជីម ភេទប្រុស អាយុ៣៣ឆ្នាំ រស់នៅភូមិព្រៃកំប៉ុក ឃុំធម្មតាអរ ស្រុកសំរោងទង ខេត្ដកំពុងស្ពឺ រងរបួសធ្ងន់។ រថយន្តនេះបានបុកជាមួយរថយន្តម៉ាកឡុងគ្រឺស័រពាក់ផ្លាកលេខ ភ្នំពេញ 2F-3212 បើកបរដោយឈ្មោះ សុត សឿន ភេទប្រុស អាយុ៥២ឆ្នាំ រស់នៅភូមិអូរតាប៉ោង ឃុំ អូរតាប៉ោង ស្រុកបាកាន ខេត្ដពោធិ៍សាត់។
លោកវរសេនីយ៍ឯក រស់ ចំរើន បន្តថា ករណីគ្រោះថ្នាក់ចរាចរណ៍នេះបណ្ដាលឱ្យខូចខាតរថយន្ត២គ្រឿង និងរងរបួសធ្ងន់ម្នាក់។ បច្ចុប្បន្នមធ្យោបាយទាំងពីរយកមករក្សាទុកនៅការិយាល័យនគរបាលចរាចរណ៍ផ្លូវគោកខេត្តរង់ចាំការដោះស្រាយពេលក្រោយ៕