កំពង់ឆ្នាំង៖កូនប្រុសនិងម្តាយរបួសបាក់ដៃនិងជើងក្នុងឧប្បត្តិហេតុគ្រោះថ្នាក់ចរាចរណ៍មួយដែលបង្កឡើងរវាងម៉ូតូបុកជាមួយគោយន្តកន្ត្រៃ។ហេតុការណ៍គ្រោះថ្នាក់ចរាចរណ៍នេះបានកើតឡើងនៅតាមបណ្ដោយផ្លូវក្រាលកៅស៊ូមួយខ្សែត្រង់ចំណុចភូមិស្វាយជ្រុំថ្មីឃុំស្វាយជ្រុំស្រុករលាប្អៀរខេត្តកំពង់ឆ្នាំងកាលពីព្រឹកថ្លៃទី២២ខែមិថុនាឆ្នាំ២០២០។
សមត្ថកិច្ចបានឱ្យដឹងថាជនរងគ្រោះក្នុងករណីនេះម្នាក់ឈ្មោះញិនីមអាយុ៤០ឆ្នាំរងរបួសបាក់ជើងឆ្វេងចំនួន២កំណាត់ជាម្តាយ។ម្នាក់ទៀតឈ្មោះសូចិន្តាភេទប្រុសអាយុ១៩ឆ្នាំរងរបួសបាក់ជើងខាងឆ្វេង និង ដៃឆ្វេង ត្រូវជាកូន ទាំងពីរនាក់ម្ដាយកូនរស់នៅក្នុងឃុំស្វាយជ្រុំស្រុករលាប្អៀរខេត្តកំពង់ឆ្នាំង ។
សមត្ថកិច្ចបានឱ្យដឹងទៀតថាមុនពេលកើតហេតុស្ត្រីពីរនាក់ម្ដាយកូនបានជិះម៉ូតូមួយគ្រឿងឌុបគ្នាពីរនាក់ធ្វើដំណើរត្រឡប់មកពីមន្ទីរពេទ្យបង្អែកខេត្តពេលមកដល់ចំណុចកើតហេតុក៏មានគោយន្តកន្ត្រៃមួយគ្រឿងសណ្ដោងរ៉ឺម៉កបើកបរដោយឈ្មោះតែមសារឿនអាយុ១៤ឆ្នាំបានបត់ចូលតាមផ្លូវគ្រួសក្រហម។ខណៈនោះជនរងគ្រោះទាំងពីរនាក់ម្តាយនិងកូនវ៉ាក់នឹងគោយន្តកន្ត្រៃគេចមិនផុតក៏ត្រូវគោយន្តកន្ត្រៃបើកកិនពីលើម៉ូតូជនរងគ្រោះបណ្តាលឱ្យជនរងគ្រោះទាំងពីរនាក់ម្តាយនិងកូនប៉ើងខ្ទាតចេញពីម៉ូតូ រងរបួសធ្ងន់បាក់ដៃនិងបាក់ជើងតែម្តង។
ក្រោយពេលកើតហេតុជនរងគ្រោះត្រូវបានដឹកយកទៅសង្គ្រោះនៅមន្ទីរពេទ្យបង្អែកខេត្តកំពង់ឆ្នាំង ដោយឡែកអ្នកបើកបរគោយន្តកន្ត្រៃបានរត់គេចខ្លួនមធ្យោបាយបង្កត្រូវបានសមត្ថកិច្ចយកមករក្សាទុកនៅប៉ុស្តិ៍រដ្ឋបាលស្វាយជ្រុំដើម្បីរង់ចាំធ្វើការដោះស្រាយតាមនីតិវិធី៕
