ភ្នំពេញ៖ បុរសម្នាក់ជិះម៉ូតូបុកខឿនចិញ្ចើមផ្លូវ ខ្ទាតមនុស្សផ្ទប់បង្គោលភ្លើង បណ្តាលឱ្យស្លាប់មួយរំពេច។ហេតុការណ៍នេះបានកើតឡើងនៅម្តុំវត្តស្លែង ផ្លូវជាតិលេខ៣ ក្នុងសង្កាត់ពងទឹក ខណ្ឌដង្កោ កាលពីវេលាវេលាទៀបភ្លឺថ្ងៃទី១៣ ខែធ្នូ។
កម្លាំងប្រចាំគោលដៅបានឱ្យដឹងថា អ្នកស្លាប់ឈ្មោះ ផឹន ណារិទ្ធិ អាយុ១៩ឆ្នាំ ស្រុកកំណើតខេត្តកំពង់ឆ្នាំង ម៉ូតូម៉ាកហុងដាឌ្រីមផ្លាកលេខកំពង់ឆ្នាំង 1E-7818 ។មុនកើតហេតុជនរងគ្រោះជិះម៉ូតូ តាមផ្លូវជាតិលេខ៣ពីជើងទៅត្បូងក្នុងល្បឿនលឿន។មកដល់កន្លែងខាងលើក៏បុកខឿនចិញ្ចើមផ្លូវ ខ្ទាតមនុស្សផ្ទប់បង្គោលភ្លើង បណ្តាលឱ្យស្លាប់តែម្តង។
បន្ទាប់មានគ្រោះថ្នាក់ចរាចរណ៍ កម្លាំងនគរបាលខណ្ឌដង្កោ បានចុះវាស់វែងហើយយកម៉ូតូទៅទុក នៅអធិការដ្ឋាននគរបាលខណ្ឌដើម្បីបន្តនីតិវិធី។រីឯសពប្រគល់ឱ្យក្រុមគ្រួសារដឹក ទៅស្រុកកំណើតដើម្បីធ្វើបុណ្យ៕
