ព័ត៌មានអន្តជាតិ

UN ស្នើឱ្យ ICJ ផ្ដល់មតិយោបល់ជុំវិញការគ្រប់គ្រងរបស់អ៊ីស្រាអែលលើទឹកដីប៉ាលីស្ទីន

នៅក្នុងការបោះឆ្នោតមួយ កាលពីថ្ងៃសុក្រសប្ដាហ៍នេះ (ម៉ោងនៅទីក្រុងញូវយ៉ក) មហាសន្និបាតអង្គការសហប្រជាជាតិ បានអនុម័តដំណោះស្រាយខាងលើក្នុងសំឡេងគាំទ្រ៨៧ ទល់នឹង ២៦សំឡេងជំទាស់ ខណៈ៥៣ប្រទេសផ្សេងទៀតបោះឆ្នោតអនុបវាទ។ ការបោះឆ្នោតនេះក៏បានបង្ហាញផងដែរពីការខ្វែងគំនិតគ្នាក្នុងចំណោមបណ្ដាប្រទេសលោកខាងលិច និងការគាំទ្រ ភាគច្រើននៅក្នុងចំណោមប្រទេសកាន់សាសនាអ៉ីស្លាម ក្នុងនោះរួមមានទាំងប្រទេសអារ៉ាប់ដែលបានចុះកិច្ចព្រមព្រៀងសន្តិភាពជាមួយអ៉ីស្រាអែល។

រុស្ស៊ី និងចិន បានបោះឆ្នោតគាំទ្រដំណោះស្រាយខាងលើ រីឯអ៊ីស្រាអែល សហរដ្ឋអាមេរិក និងបណ្ដាប្រទេស២៤ទៀត មានទាំងចក្រភពអង់គ្លេស និងអាល្លឺម៉ង់បោះឆ្នោតជំទាស់ ស្របពេល បារាំងស្ថិតនៅក្នុងចំណោមប្រទេសទាំង៥៣ ដែលបានបោះឆ្នោតអនុបវាទ។ តុលាការយុត្តិធម៌អន្តរជាតិ (ICJ) មានមូលដ្ឋាននៅទីក្រុងឡាអេ គឺជាតុលាការអន្តរជាតិមួយរបស់ អង្គការសហប្រជាជាតិមានភារកិច្ចដោះស្រាយជម្លោះរវាងរដ្ឋ និងរដ្ឋ ហើយរាល់សម្រេចក្ដីណាមួយរបស់ ICJ គឺមានលក្ខខណៈចាប់បង្ខំឱ្យអនុវត្ត បើទោះជាតុលាការនេះមិនមានសិទ្ធិអំណាច ចាប់បង្ខំឱ្យអនុវត្តក៏ដោយ។

ប៉ាឡេស្ទីន នៅថ្ងៃសៅរ៍នេះបានបង្ហាញការសាទរចំពោះការអនុម័តដំណោះស្រាយនេះដែរ ដោយចាត់ទុកថាជាការឆ្លុះបញ្ចាំងពីជ័យជម្នះមួយនៃការទូតរបស់ប៉ាឡេស្ទីន៕

pla

ឆ្លើយ​តប

អាសយដ្ឋាន​អ៊ីមែល​របស់​អ្នក​នឹង​មិន​ត្រូវ​ផ្សាយ​ទេ។ វាល​ដែល​ត្រូវ​ការ​ត្រូវ​បាន​គូស *