អន្តរជាតិ៖ទស្សនាវដ្តីElleបានរាយការណ៍ថាតារាទូរទស្សន៍នាងកាដាសៀនសន្យាជួយចេញថ្លៃព្យាបាលដល់បាតុករស្រីម្នាក់ ដែលរងរបួសធ្ងន់ធ្ងរដោយសារគ្រាប់កាំភ្លើងជ័រនៅទីក្រុងល្វីសវីល រដ្ឋកេនថាក់គី។ការតវ៉ាបានផ្ទុះឡើងទូទាំងសហរដ្ឋអាមេរិកក្រោយមរណភាពរបស់ចចផ្លយនៅថ្ងៃទី២៥ឧសភាខណៈត្រូវប៉ូលិសឈ្មោះ ដេរិក ឆូវីន សង្កត់កស្លាប់ពេលកំពុងឃាត់ខ្លួន។
នាងកាដាសៀនអាយុ៣៩ឆ្នាំបានបង្ហោះរូបថតលើTwitterកាលពីថ្ងៃទី២មិថុនាឆ្នាំ២០២០ដែលបង្ហាញបាតុករម្នាក់ត្រូវគ្រាប់កាំភ្លើងជ័រលើថ្ងាសបណ្តាលឱ្យហូរឈាមស្រោចពេញខ្លួននិងរងរបួសធ្ងន់ធ្ងរ។ភ្នែកឆ្វេងរបស់នាងហើមប៉ោងនិងជាំខ្លាំង។នាងបានសរសេរអមរូបថតនោះថា“គ្រាប់កាំភ្លើងជ័របាញ់ដោយប៉ូលិសបានធ្វើឱ្យខូចមុខយុវតីសិស្សសាលារូបនេះជារៀងរហូតនៅឯការតវ៉ាដោយសន្តិវិធីនៅទីក្រុងមីននីប៉ូលិស…។នាងត្រូវគេបាញ់នៅចម្ងាយកៀកបំផុត”។
នាងកាដាសៀន ដែលបានបញ្ចេញសំឡេងគាំទ្រយ៉ាងខ្លាំងក្លាដល់ចលនា Black Lives Matter បាននិយាយថា“នេះពិតជាខូចចិត្តនិងតក់ស្លុតណាស់។តើមាននរណាដឹងពីរបៀបទាក់ទងទៅនាងទេ?ខ្ញុំចង់ជួយចេញថ្លៃព្យាបាលដល់នាងប្រសិនបើនាងត្រូវការវា”។អ្នកលេងTwtterជាច្រើននាក់បានជួយភ្ជាប់សេដ្ឋីគ្រឿងសម្អាងរូបនេះទៅបាតុកររបួសឈ្មោះសាននីនដោយចែករំលែកគណនីផ្ទាល់របស់បាតុករនោះ៕
