ភ្នំពេញ៖បុរសម្នាក់បានបើករថយន្តម៉ាកមែរសឺដេសទំនងស្រវឹងហើយជ្រុលទៅបុកម៉ូតូហុងដាឌ្រីមជិះឌុបគ្នា៣នាក់ពីក្រោយបណ្ដាលឱ្យរបួសធ្ងន់ស្រាល៣នាក់។ហេតុការណ៍នេះបានកើតឡើងនៅតាមផ្លូវជាតិលេខ១ ក្នុងសង្កាត់វាលស្បូវ ខណ្ឌច្បារអំពៅកាលពីរំលងអធ្រាត្រចូលថ្ងៃទី១១ ខែមេសាឆ្នាំ២០២២។
សាក្សីបានឱ្យដឹងថា មុនកើតហេតុមានម៉ូតូហុងដាឌ្រីមផ្លាកលេខភ្នំពេញ1GH-0701ជិះគ្នា៣នាក់ធ្វើដំណើរតាមផ្លូវជាតិលេខ១ពីកើតទៅលិច។ម៉ូតូបានស៊ីញ៉ូអែបខាងស្រាប់តែមានរថយន្តមែរសឺដេសC220ផ្លាកលេខ ភ្នំពេញ 2J-0705 ក្នុងទិសដៅស្របគ្នាបើកបរដោយបុរសម្នាក់វ័យប្រហែលជាង៥០ឆ្នាំទំនងស្រវឹងក៏ជ្រុលទៅបុកម៉ូតូពីក្រោយបណ្ដាលឱ្យស្ត្រីម្នាក់ដែលអង្គុយកណ្តាលរងរបួសធ្ងន់ធ្ងរ។
ចំណែក២នាក់ទៀតរងរបួសស្រាល។រថយន្តបានរងការខូចខាតផែ្នកខាងមុខយ៉ាងដំណំ។
ក្រោយកើតហេតុភាគីសងខាងបានសម្របសម្រួលមិនត្រូវរ៉ូវគ្នាទើបសមត្ថកិច្ចចុះយកធ្យោបាយទាំង២គ្រឿងទៅរក្សាទុកនៅអធិការដ្ឋាននគរបាលខណ្ឌច្បារអំពៅដើម្បីរង់ចាំដោះស្រាយពេលក្រោយ ៕
