សៀមរាប: រថយន្តទំនើបមួយគ្រឿងបានបើកបុកម៉ូតូម៉ាកហុងដាឌ្រីមជិះឌុបគ្នា២នាក់បណ្ដាលឱ្យរបួសធ្ងន់ហើយបើករត់គេចខ្លួនត្រូវសមត្ថកិច្ចតាមចាប់បានមកវិញ។ករណីគ្រោះថ្នាក់ចរាចរណ៍នេះបានកើតឡើងនៅក្នុងភូមិពោធិ៍សិរីឃុំកំពង់ក្តីស្រុកជីក្រែងខេត្តសៀមរាបកាលពីរសៀលថ្ងៃទី១៨ ខែសីហា ឆ្នាំ២០២០។
សមត្ថកិច្ចនគរបាលស្រុកជីក្រែងបានឱ្យដឹងថានៅមុនពេលកើតហេតុគេបានឃើញម៉ូតូម៉ាកហុងដាឌ្រីមសេ១២៥ ផលិតឆ្នាំ២០១៧ ពាក់ស្លាកលេខសៀមរាប១Y-៧១១៨ ពណ៌ខ្មៅ ជិះឌុបគ្នា២នាក់ ។នៅពេលជនរងគ្រោះឆ្លងផ្លូវស្រាប់តែមានរថយន្តម៉ាកLEXUS.LS4.60Lពាក់ស្លាកលេខខេមរភូមិន្ទ០១:២-៨៥៥៤ ប្រភេទទេសចរណ៍ ពណ៌ខ្មៅ។រថយន្តបានបុកជាមួយម៉ូតូជនរងគ្រោះបណ្តាលឱ្យជនរងគ្រោះទាំង២នាក់រងរបួសធ្ងន់ត្រូវបានបញ្ជូនទៅមន្ទីរពេទ្យបង្អែកស្រុកជីក្រែង។
សមត្ថកិច្ចបានបញ្ជាក់ថា ក្រោយពេលកើតហេតុអ្នកបើករថយន្តបានបើករត់គេចពីកន្លែងកើតហេតុ ។ប៉ុន្តែសមត្ថកិច្ចតាមចាប់បាននៅក្នុងវត្តខ្នាធ្នង់នៅចំណុចវាលស្រែខាងលិចវត្ត ស្ថិតនៅភូមិគោករមាស ឃុំគោកធ្លកក្រោម ស្រុកជីក្រែង។ជនសង្ស័យម្នាក់ឈ្មោះ ទិត វាសនា ភេទប្រុស អាយុ៣២ឆ្នាំ រស់នៅរាជធានីភ្នំពេញ។
ជនរងគ្រោះមានឈ្មោះ ផុន ហេង ភេទស្រីអាយុ២៣ឆ្នាំ ជាអ្នកបើកម៉ូតូ ចំណែកម្នាក់ទៀតមានឈ្មោះ តឿ ធី ភេទស្រី អាយុ១៣ឆ្នាំ។ អ្នកទាំង២រស់នៅភូមិតាយ៉ុន ឃុំស្ពានស្ពានត្នោតស្រុកជីក្រែង។ក្រោយកើតហេតុសមត្ថកិច្ចបានយករថយន្តទៅរក្សាទុកនៅអធិការដ្ឋានគរបាលស្រុកដើម្បីរង់ចាំការដោះស្រាយតាមផ្លូវច្បាប់៕
