កែបៈអ្នកបើកបរស្ថិតក្នុងស្ថានភាពស្រវឹងពីរនាក់បានស្លាប់នៅនឹងកន្លែងព្រោះប្រើប្រាស់ល្បឿនលឿន រួចបុកគ្នា ពេញទំហឹង ពេលធ្វើដំណើរបញ្ច្រាសទិសគ្នា។ ហេតុការណ៍នេះ បានកើតឡើង កាលពីយប់ថ្ងៃទី២១ ខែកញ្ញា ឆ្នាំ២០២ នៅលើកំណាត់ ផ្លូវជាតិលេខ៣៣ ស្ថិតក្នុងភូមិដំណាក់ចំបក់ សង្កាត់អូរក្រសារ ក្រុងកែប។
មន្ត្រីនគរបាលខេត្តកែប បានប្រាប់ឱ្យដឹងថាៈ អ្នកដែលស្លាប់ទាំងពីរ១.ឈ្មោះ ចាន់ ហឿន អាយុ៣០ឆ្នាំ ជាសន្តិសុខ វិមានលម្ហែ ទ្រីភាព ផាលែសនៅ ភូមិត្រពាំងធំ ឃុំត្រពាំងសង្កែ ស្រុកទឹកឈូ ខេត្តកំពត។ ២.ឈ្មោះ តូង សុវណ្ណារិទ្ធ អាយុ៣១ឆ្នាំនៅ ភូមិវត្តចាស់ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ តែមកលេងស្រុកកំណើត ក្នុងភូមិអំពេង ឃុំអង្កោល ស្រុកដំណាក់ចង្អើរ ខេត្តកែប ។
ក្រោយគ្រោះថ្នាក់ភ្លាមៗ សមត្ថកិច្ច បានទៅដល់កន្លែងកើតហេតុ ឃើញភាគីទាំងសងខាង បាត់បង់ជីវិត ទើបហៅរថយន្តសង្គ្រោះ របស់ស្នងការរដ្ឋាន នគរបាលខេត្តកែប ដឹកសពប្រគល់ជូនក្រុមគ្រួសារ ដើម្បីធ្វើបុណ្យតាមប្រពៃណី រៀងៗខ្លួន។ សមត្ថកិច្ច បានបញ្ជាក់ថា អ្នកទាំងពីរ សុទ្ធតែស្រវឹងជោកជាំដូចគ្នា៕
