ខេត្តព្រះសីហនុ៖សមត្ថកិច្ចនគរបាលបានឃាត់ខ្លួនជនសង្ស័យចំនួន៣នាក់នៅកន្លែងផ្សេងគ្នាដែលរកឃើញថាមានការពាក់ព័ន្ធនិងបទល្មើសគ្រឿងញៀន។ក្នុងនោះក៏មានជនជាតិចិនម្នាក់ផងដែរ។
មន្ត្រីនគរបាលជំនាញផ្នែកគ្រឿងញៀននៃស្នងការដ្ឋាននគរបាលខេត្តព្រះសីហនុបានឱ្យដឹងថា៖ករណីទី១,កាលយប់ថ្ងៃទី២៨ខែមិថុនាឆ្នាំ២០២០នៅភូមិព្រៃនប់១ឃុំព្រៃនប់ស្រុកព្រៃនប់ខេត្តព្រះសីហនុ កម្លាំងបានឃាត់ខ្លួនជនសង្ស័យ២នាក់។ឈ្មោះគង់វណ្ណ:អាយុ២៨ឆ្នាំភេទប្រុសនិងឈ្មោះគង់សុភ័ណ្ឌអាយុ២០ឆ្នាំភេទប្រុស។ដកហូតបានវត្ថុតាងម្សៅក្រាមពណ៌សថ្លាសង្ស័យសារធាតុញៀន៣កញ្ចប់,ទូរស័ព្ទដៃ២គ្រឿងនិងម៉ូតូ១គ្រឿង ។
ករណីទី២,យប់រំលងអាធ្រាត្រចូលថ្ងៃទី២៩ខែមិថុនានេះដែរនៅភូមិ៣សង្កាត់៤ក្រុងព្រះសីហនុកម្លាំងបានឃាត់ខ្លួនជនសង្ស័យម្នាក់ឈ្មោះYangJiangKunភេទប្រុសអាយុ៣០ឆ្នាំជនជាតិចិន។ដកហូតវត្ថុតាងម្សៅក្រាមពណ៌សថ្លាសង្ស័យសារធាតុញៀន៣កញ្ចប់,ថ្នាំW.Yចំនួន៩គ្រាប់ទូរស័ព្ទដៃ២គ្រឿង។បច្ចុប្បន្នជនសង្ស័យទាំង៣ នេះនគរបាលជំនាញកំពុងកសាងសំណុំរឿងតាមនីតិវិធី ៕
