ព្រះសីហនុ៖កម្លាំងនគរបាលចាប់ខ្លួនហើយជនសង្ស័យប្រើកាំបិតចុងស្រួចចាក់ជនរងគ្រោះសន្តិសុខម្នាក់បណ្តាលឱ្យស្លាប់កាលពីយប់ថ្ងៃទី២៩កញ្ញា២០២០នៅខាងក្រោយសណ្ឋាគារខ្សាច់សក្នុងភូមិ៤សង្កាត់៤ក្រុងព្រះសីហនុ។
សមត្ថកិច្ចបានឱ្យដឹងថា ក្រោយបានឃើញ និងចុះពិនិត្យមើលកន្លែងកើតហេតុ សមត្ថកិច្ចទំនាញ បានបើកការស៊ើបអង្កេត រហូតចាប់ខ្លួនបានជនសង្ស័យម្នាក់ ដែលជាឃាតក មានឈ្មោះ ហ៊ាប រតនា ភេទប្រុសអាយុ២១ឆ្នាំមុខរបរសន្តិសុខកាស៊ីណូប្លាទីនអន្តរជាតិ។ជននេះបានយកកាំបិតចុងស្រួចចាក់ទៅលើ ជនរងគ្រោះឈ្មោះ អេល ហាំម៉ាត់ ភេទប្រុស អាយុ២៤ឆ្នាំ ជនជាតិខ្មែរអ៊ិស្លាម មុខរបរដូចគ្នា ត្រូវចំដើមទ្រូងខាងឆ្វេងបណ្តាលឱ្យរបួសធ្ងន់ហើយបានស្លាប់ពេលបញ្ជូនទៅដល់មន្ទីរពេទ្យ។
សមត្ថកិច្ចបានបន្តថាបើយោងតាមចម្លើយសារភាពរបស់ជនសង្ស័យប្រើអំពើហិង្សាដែលបង្ករហូតដល់ក្លាយជាឃាតកម្មបែបនេះគឺកើតឡើងដោយសារមានទំនាស់គ្នាយ៉ាងខ្លាំងនៅកន្លែងយាមកាម។
បច្ចុប្បន្ន ជនសង្ស័យត្រូវបានសមត្ថកិច្ចបញ្ជូនទៅឃុំខ្លួននៅស្នងការនគរបាលខេត្តព្រះសីហនុ ដើម្បីកសាងសំណុំរឿងបញ្ជូនទៅតុលាការ៕សហការី
