ព្រះវិហារ៖ពលរដ្ឋចំនួន២០៩គ្រួសាររស់នៅភូមិធម្មជាតិឃុំស្រអែមស្រុកជាំក្សាន្តកាលពីព្រឹកថ្ងៃទី៤ខែមិថុនាឆ្នាំ២០២០បានចូលរួមចាប់ឆ្នោតទទួលយកដីឡូតិ៍កសិកម្ម។ជាដីសម្បទានសង្គមកិច្ចដែលរាជរដ្ឋាភិបាលបានប្រគល់ជូនតាមរយៈអាជ្ញាធរខេត្តព្រះវិហារជាជំហ៊ានទី២បន្ទាប់ពីជំហ៊ានទី១ បានចាប់ឆ្នោតរួចចំនួន៩៩គ្រួសារ។
ពិធីចាប់ឆ្នោតទទួលយកដីកសិកម្មនេះបានធ្វើឡើងក្រោមវត្តមានលោកប្រាក់សុវណ្ណអភិបាលខេត្តនិងជាប្រធានគណៈកម្មការគ្រប់គ្រងដីរដ្ឋថ្នាក់ខេត្ត។លោកឧត្តមសេនីយ៍ឯកស្រីឌឹកមេបញ្ជាការកងពលធំអន្តរាគមន៍លេខ៣ដោយមានការចូលរួមពីថ្នាក់ដឹកនាំខេត្តប្រធានមន្ទីរអង្គភាពពាក់ព័ន្ធនិងអជ្ញាធរមូលដ្ឋានភូមិ ឃុំ ស្រុក ជាច្រើនរូបទៀត។
លោកប្រាក់សុវណ្ណបានថ្លែងថាដីឡូតិ៍កសិកម្មដែលប្រគល់ជូនប្រជាពលរដ្ឋនេះគឺផ្តើមចេញពីអនុក្រឹត្យលេខ០២អនក្រ.បកចុះថ្ងៃទី៦ខែមករាឆ្នាំ២០១៦ស្តីពីការកំណត់តំបន់សហគមន៍ស្ថិតក្នុងតំបន់ដែនជម្រកសត្វព្រៃគូលែន ព្រហ្មទេព។លើផ្ទៃដីចំនួន៥.០០០ហិកតាស្ថិតក្នុងភូមិសាស្ត្រឃុំយាងនិងឃុំកន្ទួត ស្រុកជាំក្សាន្ត ខេត្តព្រះវិហារ។
លោកអភិបាលខេត្តបានបញ្ជាក់ទៀតថា៖ខេត្តព្រះវិហារទទួលបានអនុក្រឹត្យកំណត់តំបន់សហគមន៍ក្នុងឆ្នាំ២០១៦ក្នុងអាណត្តិអភិបាលខេត្តមុនៗ។ដោយឡែកក្នុងឆ្នាំ២០២០ក្នុងអាណត្តិរបស់លោកជាអភិបាលខេត្តបានចាត់តាំងក្រុមការងារគណៈកម្មាធិការបែងចែកនិងប្រើប្រាស់ដីខេត្តរៀបចំផ្តល់ដីសម្បទានសង្គមកិច្ច(ដីកសិកម្ម)ជូនប្រជាពលរដ្ឋចំនួន១.០៤៥គ្រួសារដែលបានទទួលដីលំនៅស្ថានក្នុងភូមិធម្មជាតិរួចហើយ។
លោកប្រាក់សុវណ្ណបានឱ្យដឹងទៀតថាចាប់ពីពេលនេះតទៅប្រជាពលរដ្ឋនឹងទទួលបាននូវសុវត្ថិភាពនៃការកាន់កាប់ដីធ្លីរបស់ខ្លួន ហើយបាតុភាពរំលោភបំពានលើដីធ្លី ដែលធ្លាប់ជួបប្រទះនៅពេលមុនៗ នឹងត្រូវបានបញ្ចប់ជាស្ថាពរ។ទន្ទឹមនេះប្រជាពលរដ្ឋដែលទទួលបានដីកសិកម្ម២ហិកតានេះមានសិទ្ធប្រើប្រាស់អាស្រ័យផលផ្តាច់ដោយកុំឱ្យយកដីនេះទៅប្រើប្រាស់ក្នុងបទណាមួយដែលច្បាប់ហាមឃាត់។
ត្រូវប្រើប្រាស់ដីនេះដាំដំណាំផ្សេងៗជាបន្តាបន្ទាប់ឱ្យគ្រប់រយៈពេល៥ឆ្នាំទើបអាចមានសិទ្ធិយកដីនេះទៅលក់ដូរជួលផ្ទេរឫបញ្ចាំធានាគារបាន។ជាមួយគ្នានេះលោកប្រាក់សុវណ្ណក៏បានណែនាំឱ្យអាជ្ញាធរដែនដីនិងសមត្ថកិច្ចពាក់ព័ន្ធត្រូវអនុវត្តតាមច្បាប់លិខិតបទដ្ឋានគតិយុទ្ធជាធរមានព្រមទាំងបទបញ្ជារបស់រាជរដ្ឋាភិបាលប្រកបដោយប្រសិទ្ធិភាព។
មានមនសិការទទួលខុសត្រូវខ្ពស់ការពារកុំឱ្យមានការចូលកាន់កាប់ទន្ទ្រានដីរដ្ឋបោះបង្គោលលើដីរដ្ឋថ្មីៗត្រូវហាមឃាត់ជាដាច់ខាតដើម្បីថែរក្សាទ្រព្យសម្បត្តិធម្មជាតិរបស់ប្រទេសជាតិឱ្យមានចីរភាពតជំនាន់ទៅអនាគត៕