រថយន្តបុកបន្តគ្នា និងជ្រុលទៅបុកម៉ូតូក្មេងស្រីម្នាក់ស្លាប់ និងរបួសធ្ងន់ម្នាក់

កំពង់ចាម៖រថយន្តពីរគ្រឿងបានបុកបន្តគ្នាហើយជ្រុលទៅបុកម៉ូតូបណ្តាលឱ្យក្មេងស្រីវ័យជំទង់ម្នាក់ស្លាប់និងម្នាក់ទៀយរងរបួសធ្ងន់ ។
គ្រោះថ្នាក់ចរាចរណ៍នេះបានកើតឡើងនៅលើកំណាត់ផ្លូវជាតិលេខ៧១ក្នុងភូមិ១០មករា ឃុំបុសខ្នុរ ស្រុកចម្ការលើ ខេត្តកំពង់ចាមកាលពីរសៀលថ្ងៃទី៦ ខែកក្កដា ឆ្នាំ២០២១។
សាក្សីបាននិយាយប្រាប់ Cambodia Flash News ថា: នារីរងគ្រោះដែលបានស្លាប់ នៅនឹងកន្លែង ឈ្មោះ សារ៉ន គីមឡាងអាយុ១៤ ឆ្នាំ និងអ្នករងរបួស ជាអ្នកបើកម៉ូតូម៉ាកវ៉េវគ្មានផ្លាកលេខ ឈ្មោះ អាង នីតាអាយុ១៦ ឆ្នាំនារីរងគ្រោះទាំងពីរនាក់នៅភូមិ៣៥ ឃុំបុសខ្នុរ។
ប្រភពដដែលបានបន្តថា រថយន្តដែលបើកបុក និងកិនអ្នកដួលម៉ូតូម៉ាកអ៊ីស៊ុយស៊ុយជាប្រភេទរថយន្តស៊ីទែនដឹកប្រេងរបស់ក្រុមហ៊ុនតេលាលេខភ្នំពេញ 3B-5938 បើកបរដោយបុរស ឈ្មោះ ប៉ិច វិតអាយុ២៨ ឆ្នាំ នៅភូមិអម្ពិលលើ ឃុំអម្ពិល ស្រុកកំពង់សៀម។
ជាមួយនោះក៏មានរថយន្តដែលបើកបុកបន្តពីក្រោយមួយគ្រឿងទៀតម៉ាកនីសាន់ពាក់ផ្លាក លេខត្បូងឃ្មុំ 3A-2135 បើកបរដោយបុរស ឈ្មោះ សយ ចំរើនអាយុ ៣០ ឆ្នាំ នៅភូមិជប់ ឃុំជប់ ស្រុក និងខេត្តត្បូងឃ្មុំ។ក្រោយកើតហេតុនគរបាលចរាចរណ៍បានចុះពិនិត្យនិងប្រមូលមធ្យោបាយដើម្បីរក្សាទុកនិងកសាងសំណុំរឿងចាត់ការតាមនីតិវិធី៕