ឧត្តមសេនីយ៍ឯក រ័ត្ន ស្រ៊ាង បានបន្តចាត់ក្រុមការងារ នាំយកស្បៀងអាហារបត្ថម្ភដល់ប្រជាពលរដ្ឋ១៤នាក់ ជាប់ពាក់ព័ន្ធជាមួយសពត្រូវបានត្រួតពិនិត្យឃើញវិជ្ជមានកូវីដ-១៩ ក្រោយពីទទួលមោទនភាព ក្នុងសង្កាត់ព្រែកកំពឹស!

ភ្នំពេញ÷នាព្រឹក ថ្ងៃអាទិត្យ ទី០៤ ខែកក្កដា ឆ្នាំ២០២១ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស មេបញ្ជាការកងរាជអាវុធហត្ថរាជធានីភ្នំពេញ និងជាប្រធានក្រុមការងាររាជរដ្ឋាភិបាល ចុះមូលដ្ឋានខណ្ឌដង្កោ បានបន្តចាត់ឲ្យក្រុមការងារ ដែលមាន លោកឧត្ដមសេនីយ៍ត្រី ឈុន ប៊ុនទី មេបញ្ជាការរង កងរាជអាវុធហត្ថរាជធានីភ្នំពេញ ជាតំណាង នាំយកអំណោយជាស្បៀងរួមមាន អង្ករ មី ត្រីខ ទឹកត្រី ទឹកស៊ីអ៊ីវ ទឹកសុទ្ធ ព្រមទាំងឱសថបុរាណចិនព្យាបាលក្អក ផ្តាស់សាយ ក្តៅខ្លួន ឈឺក្បាល ការពារសួត ឧបត្ថម្ភដល់ប្រជាពលរដ្ឋ១៤នាក់ បន្ថែមទៀត ដែលជាប់ពាក់ព័ន្ធជាមួយសពស្ត្រីឈ្មោះ ញៀន សុខុម អាយុ៧១ឆ្នាំ ដែលត្រូវបានត្រួតពិនិត្យឃើញវិជ្ជមានកូវីដ-១៩ ក្រោយពីទទួលមរណភាព កំពុងធ្វើចត្តាឡីស័កតាមផ្ទះរៀងខ្លួន ក្នុងភូមិព្រែកកំពឹស សង្កាត់ព្រែកកំពឹស ខណ្ឌដង្កោ ព្រមទាំងបានចូលរួមរំលែកទុក្ខដល់ក្រុមគ្រួសារសពនូវថវិកាចំនួន ៤០០,០០០រៀល ក្នុងនោះ (ថវិកាសង្កាត់ចំនួន១០០,០០០៛ និងថវិកាភូមិចំនួន ១០០,០០០៛) ផងដែរ។

ក្នុងឱកាសនោះ លោកឧត្ដមសេនីយ៍ត្រី ឈុន ប៊ុនទី បានពាំនាំនូវការផ្តាំផ្ញើសួរសុខទុក្ខពីសំណាក់ លោកឧត្តមសេនីយ៍ឯក រ័ត្ន ស្រ៊ាង ជូនចំពោះ ប្រជាពលរដ្ឋដែលកំពុងធ្វើចត្តាឡីស័កតាមផ្ទះរៀងខ្លួនទាំងអស់ សូមអត់ធ្មត់នៅដាច់ដោយឡែកបន្តមួយរយៈទៀត ដើម្បីឲ្យប្រាកដថាមានសុវត្ថិភាព ជៀសឆ្ងាយពីជំងឺឆ្លងកូវីដ-១៩ និងសូមចូលរួមអនុវត្តឲ្យបាននូវវិធានការ ៣ការពារ ៣កុំ របស់សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ព្រមទាំងវិធានការនានា របស់ក្រសួងសុខាភិបាល ក្នុងការចូលរួមបង្កាទប់ស្កាត់ កូវីដ-១៩ ផងដែរ៕