មន្ត្រីសមត្ថកិច្ច បានឱ្យដឹងថា៖ នៅថ្ងៃទី១៥ ខែមករា ឆ្នាំ២០២១ ឈ្មោះប្រាក់ ប្រាកដ(ឧកញ៉ា) បាននិយាយធានារត់ការផ្ទេរឈ្មោះតួនាទីប្តីរបស់នាងឈ្មោះ អេង អូន ចេញពីក្របខ័ណ្ឌកងទ័ពទៅជាក្របខ័ណ្ឌនគរបាលជាតិ និងឡើងធ្វើជាស្នងការរងនគរបាលខេត្តព្រះសីហនុ ដោយទារប្រាក់រត់ការចំនួន៣០ម៉ឺនដុល្លារ។ក្រោយនិយាយត្រូវគ្នា នៅថ្ងៃទី២៦ ខែមករា ឆ្នាំ ២០២១ អ្នកស្រី ចាន់ ធូ និងស្វាមី បានប្រគល់លុយចំនួន១០ម៉ឺនដុល្លារឱ្យទៅឈ្មោះប្រាក់ ប្រាកដ ហើយរង់ចាំលទ្ធផលផ្ទេរឈ្មោះ និងតួនាទីដោយមានតួនាទីជាស្នងការរងជាផ្លូវការ ទើបប្រគល់ប្រាក់ថែម២០ម៉ឺនដុល្លារទៀត។បណ្តឹងដដែលបានឱ្យដឹងទៀតថា៖ ក្រោយទទួលបានលុយដោយសន្យាធានារត់ការផ្ទេរឈ្មោះ និងក្របខ័ណ្ឌរួចមក ឈ្មោះ ប្រាក់ប្រាកដ ពុំបានធ្វើតាមការសន្យាឡើយ ហើយបានគេចវេះមិនចេះចប់មិនចេះហើយ។ ពេលទូរសព្ទសួរនាំ និងទាមទារយកលុយមកវិញ បើខ្លួនរត់ការមិនបាន គឺឈ្មោះនេះមិនលើកទូរសព្ទ មិនតបតាមតេឡេក្រាម ហើយគេចចេញមិនចូលផ្ទះ រហូតជនរងគ្រោះសម្រេចដាក់ពាក្យបណ្ដឹងទៅតុលាការ។នៅថ្ងៃទី៣ ខែមិថុនា ឆ្នាំ២០២១ ព្រះរាជអាជ្ញារង ស៊ិត វណ្ណៈ បានចេញដីកាកោះហៅឈ្មោះ ប្រាក់ ប្រាកដ ឱ្យចូលខ្លួនមកឆ្លើយបំភ្លឺនៅថ្ងៃទី១៧ ខែមិថុនា តែឈ្មោះនេះមិនព្រមចូលខ្លួន ទើបបង្គាប់ឱ្យនាំខ្លួនតែម្ដង៕