បន្ទាយមានជ័យ៖ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យនៅព្រឹកថ្ងៃទី ២៩ ខែ មីនា ឆ្នាំ២០២៤ នេះ បានបើកកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការប្រចាំខែ មីនា ឆ្នាំ២០២៤ និងលើកទិសដៅអនុវត្តការងារសម្រាប់ខែបន្ទាប់ និងប្រជុំផ្សព្វផ្សាយផែនការ ការពារសន្តិសុខសុវត្ថិភាព និងសណ្តាប់ធ្នាប់សង្គមក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ដោយមានការចូលរួមពី លោក លោកស្រី ឧត្តមសេនីយ៍ ស្នងការរង នាយ នាយរងការិយាល័យ លោកអធិការនគរបាលក្រុង ស្រុកទាំង០៩ លោកមេបញ្ជាការវរសេនាតូចការពារព្រំដែនគោកទាំង០៤ នាយប៉ុស្តិ៍រដ្ឋបាលនគរបាលឃុំ សង្កាត់ទាំ៦៧និងនាយប៉ុស្តិ៍នគរបាលារពារព្រំដែនទាំង៣២ផងដែ។
លោកឧត្តមសេនីយ៍ត្រី រ៉ែម វីរ: ស្នងការរង ទទួលផែនការងារសេនាធិការ បានឡើងអានរបាយការណ៍ ស្តីពីប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការប្រចាំខែ មីនា ឆ្នាំ២០២៤ និងលើកទិសដៅអនុវត្តការងារសម្រាប់ខែបន្ទាប់ និងផ្សព្វផ្សាយផែនការ ការពារសន្តិសុខសុវត្ថិភាព និងសណ្តាប់ធ្នាប់សង្គមក្នុងឱកាសពិធីបុណ្យចូលឆ្នាំថ្មីប្រពាំណីជាតិខ្មែររួចមក ។
មានប្រសាសន៍បូកសរុបនាឱកាសនោះ លោកឧត្តមសេនីយ៍ទោ សិទ្ធិ ឡោះ បានដាក់ចេញនូវទិសដៅដើម្បីអនុវត្តនូវបន្តចំនួន១១ចំណុចដូចខាងក្រោម ៖១-ការងារព្រំដែន កម្លាំងវរសេនាតូចនគរបាលការពារព្រំដែនគោកទាំង៤ ជាពិសេសកម្លាំងប៉ុស្តិ៍ការពារព្រំដែនទាំង៣២ ត្រូវពង្រឹងតាមខ្សែបន្ទាត់ព្រំដែន ចុះល្បាតត្រួតពិនិត្យ និងរងចាំទទួលពលរដ្ឋខ្មែរចំណូលស្រុកត្រឡប់មកពីក្រៅប្រទេស ដែលអាជ្ញាធរថៃបញ្ជូនមក ឬមកដោយខ្លួនឯង ធ្វើការស្រាវជ្រាវរកមេខ្យល់ ដែលលួចនាំពលករឆ្លងដែនខុសច្បាប់ ដើម្បីឃាត់ខ្លួនកសាងសំណុំរឿងដើម្បីអនុវត្តតាមនិតិវិធី ត្រូវក្តាប់ពីសភាពការបំរែបំរួលតាមបន្ទាត់ព្រំដែន សភាពការនយោបាយ ចល័តទ័ព ការជួញដូរមនុស្ស ។២-ការងារសន្តិសុខ ត្រូវយកចិត្តទុកដាក់ប្រមូលព័ត៌មាន ពាក់ព័ន្ធសភាពការណ៍សន្តិសុខ សណ្តាប់ធ្នាប់សាធារណៈ ពិសេសក្តាប់ឲ្យបាននូវឧបាយកលសកម្មភាពបង្កអសន្តិសុខ ឬការញុះញង់នានាធ្វើឲ្យសង្គមមានចលាចល ដើម្បីមានវិធានការ បង្ការ-ទប់ស្កាត់ បំបាត់ប្រសិទ្ធិភាព និងបង្ក្រាបបានទាន់ពេលវេលា ។ បន្តគ្រប់គ្រង ក្តាប់ពី សាសនានិង ពង្រីក ក្រុមបច្ចេកវិទ្យាព័ត៌មានដែលបានបណ្តុះបណ្តាលហើយ តាមដានក្រុមអមិត្តដែលបង្ករ ភាពភ័យក្លាច នៅតាមបណ្តាញសង្គម ។ ៣-ផែនការងារនគរបាលព្រហ្មទណ្ឌ ត្រូវយកចិត្តទុកដាក់បង្ការ ទប់ស្កាត់មិនឲ្យកើតមានបទល្មើសព្រហ្មទណ្ឌគ្រប់ប្រភេទ ជាពិសេសសកម្មភាពបង្កការអុកឡុកដោយក្មេងទំនើង និងគ្រប់គ្រងមុខសញ្ញាចាស់-ថ្មី និងត្រូវពិនិត្យតាមដានរាល់ព័ត៌មានដែលបង្ករអសន្តិសុខតាមប្រព័ន្ធបច្ចេកវិទ្យា ។៤-ផែនការងារនគរបាលសណ្តាប់ធ្នាប់ ត្រូវយកចិត្តទុកដាក់រៀបចំសណ្តាប់ធ្នាប់ឲ្យបានល្អ និងបង្កើនការរឹតបន្តឹងត្រួតពិនិត្យការអនុវត្ដច្បាប់ចរាចរណ៍ផ្លូវគោក ដោយមានវិជ្ជាជីវៈ ក្រុមសីលធ៌មដល់បងប្អូនប្រជាពលរដ្ឋ ។ ៥-ផែនការងារអន្តោប្រវេសន៍ ត្រូវគ្រប់គ្រង ជនអន្តោប្រវេសន៍ ស្នាក់នៅក្នុងខេត្តបន្ទាយមានជ័យដែលមានឯកសារ និងពុំមានឯកសារ ក្នុងនោះអ្នកដែលមានទិដ្ឋាការស្នាក់នៅហួសរយៈពេលកំណត់ ហើយពួកគេទាំងនោះ គឺបានឃាត់ខ្លួន និងបញ្ជូនទៅអនុវត្តតាមនីតិវិធីបន្ត ។ ៦-ផែនការការងារជួញដូរមនុស្ស និងការពារអនីតិជន ត្រូវមានកិច្ចសហការល្អជាមួយអាជ្ញាធរពាក់ព័ន្ធ ដើម្បីត្រៀមលក្ខណៈជាសម្រេចសម្រាប់ទទទួលបងប្អូនប្រជាពលរដ្ឋដែលគាត់ត្រឡប់ពីប្រទេសថៃ ក្នុងអំឡុងពេលចូលឆ្នាំខ្មែរ និងបានជម្រុញឱ្យផែន ពង្រឹងលើការគ្រប់គ្រង ត្រួតពិនិត្យកន្លែង ការ៉ាអូខេ ក្លឹបកំសាន្ត ជាពិសេសលើការងារការជួញដូរផ្លូវភេទ និងកុមារ ។៧-ផែនការងារគ្រឿងញៀន ត្រូវខិតខំស្រាវជ្រាវមុខសញ្ញាប្រើប្រាសចែកចាយ ជួញដូរ រក្សាទុកនូវសារធាតុញៀន ជាពិសេសលោកអធិការនគរបាលស្រុក ក្រុង ត្រូវជំរុញលោកនាយប៉ុស្តិ៍នគរបាលរដ្ឋបាលទាំងអស់អនុវត្តន៍គោលនយោបាយភូមិ/ឃុំ/សង្កាត់ មានសុវត្ថិភាព ឲ្យបានផុសផុលនិងត្រូវយកចិត្តទុកដាក់គ្រប់គ្រងមុខសញ្ញាគ្រប់ប្រភេទ នៅតាមសហគមន៍ភូមិ/ឃុំ/សង្កាត់ ឲ្យបានហ្មត់ចត់ដោយប្រើគ្រប់វិធានការ ដើម្បីបំបាត់ប្រសិទ្ធភាពជាមុន មិនទុកឲ្យមុខសញ្ញាមានឱកាសធ្វើសកម្មភាព បង្កគ្រោះថ្នាក់ដល់អាយុជីវិត និងអន្តរាយដល់ទ្រព្យសម្បត្តិរបស់ប្រជាពលរដ្ឋ ។ ៨-ផែនការងារគ្រប់គ្រងអាវុធគ្រឿងផ្ទុះ ត្រូវជម្រុញឱ្យកងកម្លាំង នគរបាលដែលបានប្រើប្រាស់អាវុធមកចុះបញ្ជីឱ្យបានត្រឹមត្រូវ ប្រសិនករណីនគរបាលណាមិនព្រមចុះត្រូវមានវិធានការ ចំពោះការដ្ឋានបាញ់រំសែវ យកថ្មភ្នំត្រូវមានបញ្ជីគ្រប់គ្រងច្បាស់លាស់ ។ ៩-ផែនការងារអត្តសញ្ញាណកម្ម ត្រូវផ្តល់សេវាសាធារណៈឱ្យបានល្អនិងទាន់ពេលវេលា ទាំងការ ផលិត ផ្តល់ អត្តសញ្ញាណប័ណ សៀវភៅស្នាក់នៅ ក២ ក៤ ពន្លើនក្នុងផ្តល់ជូនប្រជាលរដ្ឋឱ្យបានលឿន ជាពិសេសនៅតាមអធិការដ្ឋាន និងប៉ុស្តិ៍នគរបាលរដ្ឋបាល ។ ១០-ផែន ការងារធនធានមនុស្ស គឺសេនាធិការជូនថ្នាក់ដឹកនាំ ក្នុងកិច្ចការលើកសរសើរ ជូនរង្វាន់ ដល់នគរបាលដែលមានស្នាដៃល្អក្នុងពេលបំពេញការងារ និងចុះបំពេញការងារផ្សេងៗ ។ ១១-ផែនការងារសេនាធិការ បន្តព្រឹងលើការងារ លិខិតស្នាម លិខិតចេញចូល បោះត្រា លើឯកសារផ្សេងៗ និងជាសេនាធិការជូនថ្នាកដឹកនាំ ។
ទន្ទឹមនោះដែរ លោកឧត្តមសេនីយ៍ទោ សិទ្ធិ ឡោះ ក៏បាន ណែនាំបន្ថែមដល់លោក-លោកស្រីឧត្តមសេនីយ៍ វរសេនីយ៍ស្នងការរងទទួលផែននីមួយៗ និង ថ្នាក់ដឹកនាំបណ្តាអង្គភាពនីមួយៗត្រូវម្ចាស់ការដឹកនាំត្រួត ពិនិត្យសភាពការណ៍ និងកិច្ចសហប្រតិបត្តិការតាមក្រុង/ស្រុក គោលដៅរបស់ខ្លួនដែលបានបែងចែកទទួល ខុសត្រូវនិងរាយការណ៍ជាប្រចាំនូវសភាពការណ៍កើតឡើង និងត្រៀមសម្ភារ: មធ្យោបាយ អាវុធ ស្បៀង និងត្រូវចាត់កម្លាំងប្រចាំការយាម២៤ម៉ោងលើ២៤ម៉ោង មានទាំងកម្លាំងអន្តរាគមន៍ កម្លាំងចេញល្បាត ក្នុងស្មារតីទទួលខុសត្រូវ ដើម្បីធានាឲ្យបាននូវ សន្តិសុខ សុវត្ថិភាព សណ្តាប់ធ្នាប់សាធារណ: ជូនប្រជាពលរដ្ឋ ក្នុងឱកាសថ្ងៃបុណ្យចូលឆ្នាំខ្មែរប្រពៃណីជាតិ ។
ផ្អែកតាមសេចក្តីណែនាំនេះ ត្រូវម្ចាស់ការធ្វើផែនការលំអិត និងលើកវិធានការប្រមូលផ្តុំកម្លាំងជំនាញ កម្លាំងអធិការនគរបាលក្រុង/ស្រុកទាំង៩ កម្លាំងនគរបាលប៉ុស្តិ៍រដ្ឋបាលទាំង៦៧ប្រគល់ភារកិច្ចឲ្យបានច្បាស់លាស់ ការពារសន្តិសុខ សណ្តាប់ធ្នាប់ និងសុវត្ថិភាព តាមវត្តអារមា និងជាទីសក្ការៈនានា ព្រមទាំងគោលដៅផ្សារនិងរមណីយដ្ឋានផ្សេងៗ ដោយសហការជាមួយកម្លាំងកងរាជអាវុធហត្ថ កម្លាំងយោធា និងសមត្ថកិច្ចផ្សេងៗទៀត និងរៀបចំកម្លាំងល្បាត ចល័តការពារបន្ថែមគ្រប់គោលដៅកំសាន្តនានាក្នុងមូលដ្ឋានរបស់ខ្លួនគ្រប់គ្រង ដោយផ្អែកតាមសភាពការណ៍ និងភូមិសាស្ត្រនីមួយៗ ៕