ពោធិ៍សាត់៖ក្នុងហេតុការណ៍២ផ្សេងគ្នា បណ្តាលឱ្យមនុស្ស២នាក់បានស្លាប់ គឺទី១-ធ្វើអត្តឃាតនិងទី២-ឆ្លងចរន្ដអគ្គិសនីនៅស្រុកក្រគរ កាលពីរសៀលថ្ងៃទី៨ ខែតុលាឆ្នាំ២០២៣។
មន្ត្រីអាជ្ញាធរស្រុកបានឱ្យដឹងថា មនុស្ស២នាក់បានស្លាប់ ក្នុងហេតុការណ៍២ផ្សេងគ្នាដោយម្នាក់ចងកសម្លាប់ខ្លួននិងម្នាក់ទៀតត្រូវឆ្លងចរន្ដអគ្គិសនីឆក់ស្លាប់។ មន្ត្រីដដែលបានបន្តថា ករណីទី១-ឈ្មោះ ហុក ហុងសេង អាយុ ២៨ឆ្នាំនៅភូមិកណ្ដាល ឃុំក្បាលត្រាច ស្រុកក្រគរខេត្តពោធិ៍សាត់។អត្តឃាតជនបានចងកសម្លាប់ខ្លួនឯងនឹងខ្សែនីឡុងក្នុងបន្ទប់ទឹក មូលហេតុអាចបណ្ដាលមកពីសុំលុយបងប្អូននិងម្ដាយមិនបាន ។
ប្រភពបានបន្តថា ករណីទី២-ឈ្មោះ ប៊ូ ភារម្យ អាយុ ៣៩ឆ្នាំនៅភូមិថ្គោលធំ ឃុំអន្សាចំបក់ ស្រុកក្រគរ មូលហេតុជនរងគ្រោះដើរជាន់ចំមុខដំណរខ្សែភ្លើង បណ្តាលឱ្យឆក់ស្លាប់នៅម្តុំរោងចក្រ“តៃអ៊ីហ្សី”ស្ថិតនៅភូមិទទឹង ឃុំអន្លង់ត្នោត ស្រុកក្រគរ ខេត្តពោធិ៍សាត់។
ក្រោយពីមានហេតុការណ៍កើតឡើងក្រុមមន្ត្រីជំនាញ បានសហការចុះពិនិត្យ និងប្រគល់សពឱ្យក្រុមគ្រួសារយកទៅធ្វើបុណ្យ៕
