(បាត់ដំបង)៖ ក្រុមការងារព័ត៌មាននិងប្រតិកម្មរហ័សនៃស្នងការដ្ឋាននគរបាលខេត្តបាត់ដំបងមានកិត្តិយសសូមគោរព ជម្រាបជូនសាធារណជន អ្នកសារព័ត៌មាននិងអ្នកនិយមប្រើប្រាស់បណ្តាញសង្គម បានជ្រាបថាថ្មីៗនេះពិនិត្យឃើញឃ្លីបវីដេអូមួយដែលបានផ្សព្វផ្សាយក្នុងបណ្តាញសង្គម ទាក់ទងនឹងសមត្ថកិច្ចនគរបាលចរាចរណ៍ផ្លូវគោក ពិនិត្យការបើកបរលើសល្បឿនកំណត់របស់អ្នកប្រើប្រាស់ផ្លូវនៅលើផ្លូវជាតិលេខ៥៧ ចំណុចខាងលិចភ្នំសំពៅស្រុកបាណន់ខេត្តបាត់ដំបង។
ក្នុងឃ្លីបវីដេអូនេះបានបង្ហាញឱ្យឃើញថា បុរសអ្នកបើកបររថយន្តម្នាក់និងបក្សពួកគាត់ជាច្រើននាក់ បានចូលមកគោលដៅបំពេញភារកិច្ចរបស់មន្រ្តីនគរបាលចរាចរណ៍ផ្លូវគោកត្រង់ចំណុចភូមិគោកពន្លៃសង្កាត់អូរម៉ាល់ ក្រុងបាត់ដំបង ខណៈដែលរូបគាត់ត្រូវបានសមត្ថកិច្ចនគរបាលពិនិត្យឃើញថាគាត់និងគ្នារបស់គាត់បើកបរលើសល្បឿនកំណត់នៅចំណុចទីតាំងនោះ។
ពេលមកដល់បុរសរូបនោះរៀបចំថតរូបភាពជាវីដេអូជាស្រេច ក្នុងនោះបានធ្វើសកម្មភាពចោទប្រកាន់ថានគរបាលចរាចរណ៍ត្រួតពិនិត្យល្បឿនម្តងដាក់ កន្លែងនេះម្តងដាក់កន្លែងនោះ ធ្វើដូចជាចោរអីចឹង! ដែលជាហេតុនាំឱ្យគាត់មានការលំបាកក្នុងការធ្វើដំណើរហើយគាត់ស្នើឱ្យមានការដាក់ស្លាកប្រាប់ឱ្យគាត់ដឹងផងថា នៅខាងមុខមានកន្លែងត្រួតពិនិត្យល្បឿន? ។
នៅពេលគាត់ថតរូបភាពដោយប្រេីពាក្យសំដីនិងសកម្មភាពខាងលេីរួច គាត់និងបក្សពួកនាំគ្នាចាកចេញពីទីនោះ ដោយសមត្ថកិច្ចមិនអាចអនុវត្តច្បាប់ចំពោះកំហុសគាត់បាននៅឡេីយទេ។ ក្រោយចាកចេញគាត់និងបក្សពួកបានបង្ហោះឃ្លីបវីដេអូដែ លថតរួចទៅក្នុងបណ្តាញសង្គម ហេីយនាំបង្កឱ្យមា នការចាប់អារម្មណ៍និងមានការយល់ច្រឡំចំពោះ ទិដ្ឋភាពមួយនេះ។
ពិនិត្យលេីសកម្មភាពរបស់បុរសខាងលើ និងបក្សពួកគាត់នៅពេលនោះ បានធ្វើឱ្យប៉ះពាល់ដល់កិត្តិយសនិងសេចក្តីថ្លៃថ្នូរ របស់មន្រ្តីនគរបាល និងរំខានដល់កិច្ចប្រតិបត្តិការរបស់សមត្ថកិច្ចក្នុងពេលកំពុងបំពេញភារកិច្ចលើដងផ្លូវរក្សាសុខសុវត្ថិភាពជូនមហាជនទូទៅដែលធ្វើដំណើរ ព្រមទាំងបង្ហាញនូវគំរូអាក្រក់និងជាហេតុនាំឱ្យមានការភាន់ច្រឡំពីមជ្ឈដ្ឋានមហាជនទូទៅ ឬអាចវាយតម្លៃមិនល្អចំពោះកិច្ចខិតខំបំពេញភារកិច្ចរបស់មន្រ្តីនគរបាលចរាចរណ៍ ។
សូមជម្រាបជូនថា ការបំពេញភារកិច្ចរបស់មន្រ្តីនគរបាលចរាចរណ៍នៅលើដងផ្លូវ នោះគឺជាកាតព្វកិច្ចដែលច្បាប់តម្រូវឱ្យមន្រ្តីនគរបាលចរាចរណ៍អនុវត្ត យ៉ាងណាមិញអ្នកប្រើប្រាស់ផ្លូវគ្រប់រូបត្រូវមានករណីយកិច្ចក្នុងការចូលរួមគោរពនិងអនុវត្តច្បាប់ ស្តីពីចរាចរណ៍ផ្លូវគោកទាំងអស់គ្នាផងដែរ ។
ការគោរពនិងអនុវត្តច្បាប់មិនមែនគោរពតែនៅទីកន្លែងណាដែលមានមន្រ្តីនគរបាលចរាចរណ៍ស្ថិតនៅបំពេញភារកិច្ចនោះទេ រីឯទីកន្លែងណាដែលមិនមានសមត្ថកិច្ចនគរបាលចរាចរណ៍បំពេញភារកិច្ចនោះ អ្នកប្រើប្រាស់ផ្លូវធ្វើសកម្មភាពបំពានច្បាប់នោះឡើយ ។
នៅថ្ងៃទី ២៩ ខែ ធ្នូ ឆ្នាំ ២០២២នេះសមត្ថកិច្ចនគរបាលបានធ្វើការទំនាក់ទំនងកោះអញ្ជើញរូបគាត់ឱ្យចូលមកបំភ្លឺចំពោះការចោទប្រកាន់នេះហើយតាមរយៈទូរស័ព្ទលេខ 085878703 ដែលបញ្ហានេះរូបគាត់បានស្នើសុំចូលខ្លួនមកបំភ្លឺនៅថ្ងៃទី ០២ ខែ មករា ឆ្នាំ ២០២៣ ខាងមុខ ។ ចំពោះខ្លឹមសារលម្អិតយើងខ្ញុំនឹងធ្វើការផ្សព្វផ្សាយនៅពេលទទួលបានលទ្ធផលក្រោយការបំភ្លឺរបស់គាត់រួច។
ដូចបានជម្រាបជូនខាងលើ សូមសាធារណជន អ្នកសារព័ត៌មាននិងអ្នកនិយមប្រើប្រាស់បណ្តាញសង្គមមេត្តាជ្រាបជាព័ត៌មាន និងសូមបន្តចូលរួមសហការ ជាមួយសមត្ថកិច្ចនគរបាលដោយភារភាព សូមអរគុណ៕