ភ្នំពេញ៖សាកសពស្ត្រីម្នាក់ត្រូវបានប្រទះឃើញដេកស្លាប់ក្នុងបន្ទប់ជួលក្នុងសភាពហើយស្អុយទៅហើយសង្ស័យប្តីវាយរហូតដល់ស្លាប់។តែគ្មានអ្នកណាដឹងដោយមានចាក់សោពីក្រៅទើបរហូតដល់ហើមស្អុយទ្រាំលែងបានម្ចាស់ផ្ទះទៅគាស់បង្ហើបមើលទើបដឹងថាមានសាកសពមនុស្ស ។ករណីនេះបានកើតឡើងនៅបន្ទប់ជួលក្នុងភូមិគោកខ្សាច់សង្កាត់ប្រទះឡាងខណ្ឌកំបូលកាលពីព្រឹកថ្ងៃទី១៦ខែមិថុនាឆ្នាំ២០២០។
សពមានឈ្មោះហេងសុខខឿនភេទស្រីអាយុ៤៥ឆ្នាំទើបមកស្នាក់នៅបន្ទប់ខាងលើបាន៧ថ្ងៃ មានស្រុកកំណើត ភូមិជ្រួលឃុំបាល័ង្គ ស្រុកកំពង់ត្របែកខេត្តព្រៃវែងហើយមានប្តីក្រោយម្នាក់ទៀត អស់រយៈពេលជាង៣ឆ្នាំមានឈ្មោះពេជ្រចាន់ថាអាយុ៤៣ឆ្នាំមុខរបរកម្មករសំណង់មានស្រុកកំណើតនៅខេត្តស្វាយរៀងបានរត់គេចខ្លួនបាត់ ។
តាមស្ត្រីម្ចាស់ផ្ទះឈ្មោះសរ៉េតអាយុ៧៨ឆ្នាំបានឱ្យដឹងថាបន្ទប់ជួលរបស់ស្ត្រីខាងលើឃើញចាក់សោ៣ថ្ងៃមកហើយរហូតមកដល់ព្រឹកថ្ងៃទី១៦ខែមិថុនានេះធំក្លិនស្អុយពេកទ្រាំលែងបាននាំគ្នាហៅតែគ្មានអ្នកឆ្លើយរហូតដល់គាស់បើកបង្ហើបទ្វារទើបដឹងថាស្ត្រីខាងលើស្លាប់ក្នុងបន្ទប់សភាពហើមស្អុយទើបរាយការណ៍ទៅអាជ្ញាធរសមត្ថកិច្ច។
ករណីខាងលើដាក់ការសង្ស័យប្តីវាយរហូតដល់ស្លាប់ក្នុងបន្ទប់ចាក់សោពីក្រៅហើយទៅស្នាក់នៅកន្លែងផ្សេងតែក្នុងភូមិឥឡូវបានគេចខ្លួនបាត់។ក្រោយពីភ្ញាក់ផ្អើលប្រទះឃើញមនុស្សស្លាប់ក្នុងបន្ទប់ជួល សមត្ថកិច្ចមូលដ្ឋានសមត្ថកិច្ចចុះទៅពិនិត្យសាកសួរដល់ទីតាំងកើតហេតុមិនទាន់ធ្វើការសន្និដ្ឋានថាស្លាប់ដោយសារអ្វីនៅឡើយទេ។ខណៈដែលប្តីស្ត្រីខាងលើបានគេចខ្លួនបាត់ហើយរង់ចាំជំនាញកោសល្យវិច័យជាមុនសិន មុននឹងប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕
