ភ្នំពេញ៖ស្ត្រី២នាក់បានជិះម៉ូតូឌុបគ្នាដើរលេងពេលយប់ ទំនងងងុយដេកបានរេចង្កូតបុកបង្គោលប៉ាណូរួចជ្រុលធ្លាក់ចូលប្រឡាយទឹកស្អុយ បណ្តាលឱ្យស្លាប់ម្នាក់និងរងរបួសម្នាក់។
ហេតុការណ៍នោះបានកើតឡើង នៅតាមផ្លូវជាតិលេខ៤ ម្តុំមុខបុរីញូវថោន ស្ថិតក្នុងភូមិអង្គ ខណ្ឌពោធិ៍សែនជ័យ កាលពីយប់ថ្ងៃទី២៦ ខែមីនា។ សមត្ថកិច្ចបានឱ្យដឹងថា ស្ត្រីជិះខាងក្រោយដែលស្លាប់ឈ្មោះឈាង នីហ្សា អាយុ២៥ឆ្នាំនៅផ្លូវជាតិលេខ៥ ភូមិ៣ សង្កាត់ច្រាំងចំរ៉េះទី១ ខណ្ឌឫស្សីកែវ។ចំណែកស្ត្រីអ្នកបើកម៉ូតូឈ្មោះយ៉ាន់ ថាវី អាយុ២៩ឆ្នាំនៅស្រុកកងមាស ខេត្តកំពង់ចាម រងរបួស។
មុនកើតហេតុ ជនរងគ្រោះជិះម៉ូតូម៉ាកស៊ុយហ្ស៊ុយគីនិចផ្លាកលេខភ្នំពេញ1FI-5253 ពីកើតទៅលិចក្នុងល្បឿនលឿន។មកដល់កន្លែងខាងលើក៏រេចង្កូតទៅបុកបង្គោលផ្លាកប៉ាណូលើចិញ្ចើមផ្លូវពេញទំហឹង រួចជ្រុលធ្លាក់ចូលប្រឡាយទឹកស្អុយទាំងមនុស្សនិងម៉ូតូបណ្តាលឱ្យស្លាប់ម្នាករបួសធ្ងន់ម្នាក់។
ស្ត្រីរងរបួសបានប្រាប់នគរបាលថា នាងនិងស្ត្រីដែលស្លាប់ទើបត្រឡប់មកពីដើរលេងនៅមាត់ទន្លេ ហើយជិះម៉ូតូទៅផ្ទះជួលវិញ ហើយងងុយដេកក៏ងោកមួយភាំងក៏បានជួបគ្រោះថ្នាក់បែបនេះតែម្ដង។បន្ទាប់ពីកើតហេតុកម្លាំងនគរបាលចរាចរណ៍ខណ្ឌពោធិ៍សែនជ័យ បានចុះដល់កន្លែងរួចទាក់ទងក្រុមគ្រួសារដើម្បីមកទទួលយកសពទៅធ្វើបុណ្យ៕
