ព័ត៌មានអន្តជាតិ

លោក ពូ ទីន ព្រមានថា ការបាញ់ស្រោចមីសុីលថ្ងៃនេះ គឺជាការសងសឹកចំពោះការបំផ្ទុះស្ពានគ្រីមៀ ហើយនិងឆ្លើយតបធ្ងន់ៗទៀត បើការវាយប្រហារលើរុស៊ី្សនៅតែបន្ត

(កៀវ)៖ ប្រធានាធិបតីរុស្ស៊ីលោក វ៉្លាឌីមៀ ពូទីន បានព្រមានចាត់វិធានការឆ្លើយតបធ្ងន់ៗទៀត ប្រសិនបើការវាយប្រហារលើរុស្ស៊ី នៅតែបន្ត។ ការព្រមានរបស់លោកធ្វើឡើង តែប៉ុន្មានម៉ោងប៉ុណ្ណោះបន្ទាប់ពីកងកម្លាំងរុស្ស៊ី បានបាញ់មីស៊ីលរាប់សិបគ្រាប់ទៅលើ​ទីក្រុងជាច្រើននៅទូទាំងប្រទេសអ៊ុយក្រែន។ នេះបើតាមការចេញផ្សាយដោយ​ ទីភ្នាក់ងារសារព័ត៌មាន AFP នៅថ្ងៃចន្ទ ទី១០ ខែតុលា ឆ្នាំ២០២២។

លោកប្រធានាធិបតីរុស្ស៊ី បាននិយាយព្រមានដូចខាងលើ ក្នុងឱកាសបើកកិច្ចប្រជុំក្រុមប្រឹក្សាសន្តិសុខជាតិមួយ នាថ្ងៃចន្ទនេះ។ លោក ពូទីន បានលើកឡើងថា រុស្ស៊ីបើកការវាយប្រហារដោយមីស៉ីលរយៈចម្ងាយឆ្ងាយ ប្រឆាំងនឹងហេដ្ឋារចនាសម្ព័ន្ធថាមពល, យោធា និងទំនាក់ទំនងរបស់អ៊ុយក្រែន នាថ្ងៃនេះ ដើម្បីជាការសងសឹកសម្រាប់ការវាយប្រហារ លើស្ពានយុទ្ធសាស្រ្តដែលតភ្ជាប់​រវាងប្រទេសរុស្ស៊ីនិងឧបទ្វីបគ្រីមៀ កាលពីចុងសប្តាហ៍កន្លងទៅ។

លោក ពូទីន បានថ្លែងយ៉ាងដូច្នេះថា «ប្រសិនបើការវាយប្រហារនៅតែបន្តប្រឆាំងលើរុស្ស៊ី នោះការឆ្លើយតបធ្ងន់ៗនឹងនៅតែបន្ត។ ទំហំនៃការឆ្លើយតបរបស់យើង នឹងដូចគ្នាជាមួយទំហំនៃការគំរាមកំហែងចំពោះរុស្ស៊ីយ៉ាងដូច្នោះ។ ក្នុងករណីមានការព្យាយាម​ប្រព្រឹត្តអំពើភេរវកម្ម នៅលើទឹកដីរបស់យើងទៀតនោះ ការឆ្លើយតបរបស់រុស្ស៊ីនឹងកាន់តែធ្ងន់»

គួរបញ្ជាក់ថា ក្នុងការថ្លែងសារកាលពីថ្ងៃអាទិត្យកន្លងទៅ លោក ពូទីន បានចោទអ៊ុយក្រែន ជាអ្នកនៅពីក្រោយការបំផ្ទុះស្ពានគ្រីមៀ និងហៅវាថាជា អំពើភេរវកម្ម។ ស្ពាននោះបានដើរតួនាទី ជាមធ្យោបាយផ្គត់ផ្គង់យ៉ាងសំខាន់បំផុតមួយ សម្រាប់កងកម្លាំងរបស់រុស្ស៊ី នៅភាគខាងត្បូងអ៊ុយក្រែន៕

 

 

 

 

 

 

 

pla

ឆ្លើយ​តប

អាសយដ្ឋាន​អ៊ីមែល​របស់​អ្នក​នឹង​មិន​ត្រូវ​ផ្សាយ​ទេ។ វាល​ដែល​ត្រូវ​ការ​ត្រូវ​បាន​គូស *