ភ្នំពេញ៖បុរសម្នាក់ទំនងស្រវឹងស្រាបានបើករថយន្តទំនើបយ៉ាងលឿនជ្រុលទៅបុករបងផ្ទះប្រជាពលរដ្ឋបណ្តាឱ្យមានការខូចខាតនិងរថយន្តខ្ទេចមួយកំណាត់មុខ។
គ្រោះថ្នាក់ចរាចរណ៍នេះបានកើតឡើងស្ថិតនៅផ្លូវបេតុង ក្នុងសង្កាត់ទួលសង្កែទី១ ខណ្ឌឫស្សីកែវ កាលពីរំលងអធ្រាត្រចូលថ្ងៃទី៣ ខែកញ្ញាឆ្នាំ២០២២។
សាក្សីបានឱ្យដឹងថា មុនកើតហេតុបុរសម្នាក់មានស្ត្រីម្នាក់រួមដំណើរ ទំនងជាស្រវឹងស្រាបានបើករថយន្តម៉ាក Ford mustang ផ្លាកលេខកម្ពុជា MKN.9939 តាមផ្លូវបេតុងពីត្បូងទៅជើងក្នុងល្បឿនលឿន។រថយន្តបានរេចង្កូតទៅបុករបងផ្ទះពលរដ្ឋពេញទំហឹងបណ្តាឱ្យមានការខូចខាតនិងរថយន្តខ្ទេចមួយកំណាត់មុខ។តែមិនប៉ះពាល់ជីវិតមនុស្សទេហើយអ្នកបើករថយន្ត បានចុះរត់ឡើងផាស្អេបគេចខ្លួនបាត់។
បន្ទាប់ពីកើតហេតុសមត្ថកិច្ចជំនាញមកស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនគរបាលរាជធានីភ្នំពេញ រង់ចាំម្ចាស់ចូលខ្លួនដោះស្រាយពេលក្រោយ៕
