កំពង់ចាម៖កងបោសសម្អាតគ្រាប់មិនទាន់ផ្ទុះនៃមជ្ឈមណ្ឌលជាតិគ្រប់គ្រងកងកម្លាំងរក្សាសន្តិសុខបោសសម្អាតមីននិងកាកសំណល់សង្គ្រាម(NPMEC)បានរុករកឃើញបំណែកឆ្អឹងសាកសពទាហានម៉ារីន បានជាច្រើនបន្ថែមទៀត។ក្នុងនោះមានគ្រាប់កាំភ្លើងជាច្រើនធុនសរុបប្រមាណជាង ៨.០០០ គីឡូក្រាមនៅក្នុងនាវាចម្បាំងដែលបានលិចក្នុងទន្លេមេគង្គទឹកដីស្រុកស្រីសន្ធរនាសម័យសង្គ្រាមកន្លះសតវត្សរ៍មុន។ នេះជាការថ្លែងប្រាប់របស់លោកឧត្តមសេនីយ៍ទោ ម៉ី សុភា មេបញ្ជាការ NPMEC ទៅកាន់លោក អ៊ុន ចាន់ដាអភិបាលខេត្តកំពង់ចាមនិងសហការីអមដំណើរដែលបានចុះពិនិត្យលទ្ធផលការស្រង់គ្រាប់យុទ្ធភ័ណ្ឌនៅទីបញ្ជាការស្ថិតក្នុងភូមិវាល ឃុំមានជ័យ ស្រុកស្រីសន្ធរ នៅថ្ងៃទី ៩ ខែកុម្ភ: ឆ្នាំ២០២១។ លោកឧត្តមសេនីយ៍ទោបានបន្តថា៖មួយរយ:នេះយើងបានរុករកឃើញឆ្អឹងធាតុទាហានម៉ារីនបន្ថែមជាច្រើនទៀតមានឆ្អឹងភ្លៅមួយទៀតបំណែកឆ្អឹងលលាដ៏ក្បាលប្រាំមួយបន្ទះ។ប៉ុន្តែយើងមិនអាចកំណត់បានជាឆ្អឹងធាតុជាទាហានប៉ុន្មាននាក់បានទេនិងប្រទះឃើញជាវត្ថុសក្តិសិទ្ធការពារខ្លួនសម្រាប់ទាហានដូចជាចែកាច់ ចង្កូមខ្លា ស្បែកជើង ជាដើម។ លោកមេបញ្ជាការបានបន្ថែមថាបច្ចុប្បន្នប្រតិបត្តិការរបស់យើងប្រមូលបានគ្រាប់យុទ្ធភ័ណ្ឌមិនទាន់ផ្ទុះគ្រប់ប្រភេទចំនួនសរុប ៨.១០០ គីឡូក្រាម ស្មើនឹងប្រមាណ ៥៣.៧៧០ គ្រាប់ នៅក្នុងឃ្លុបទី១ នៃនាវាចម្បាំងខ្នាតធំប្រវែង ៤០ ម៉ែត្រ ទទឹង៥,៥០ ម៉ែត្រ និងជម្រៅ ៤,៥០ ម៉ែត្រ ដែលមានចំនួន បួន ឃ្លុប។ ក្នុងនោះឃ្លុបនីមួយៗ អាចផ្ទុកបានគ្រាប់កាំភ្លើងបានជាង ១០តោន។ លោកបានបន្តថា ប្រតិបត្តិការរុករក និងប្រមូលគ្រឿងយុទ្ធភណ្ឌក្នុងបាតទន្លេមេគង្គប្រវែង ១.៥០០ ម៉ែត្រស្មើនឹង១៥០ហិកតានេះបានចាប់អនុវត្តនៅចុងខែតុលាឆ្នាំ២០២០ដែលគ្រោងនឹងបញ្ចប់នៅខែឧសភាឆ្នាំ២០២១នេះឱ្យទាន់រដូវវស្សាទឹកជំនន់ទន្លេនេះ។ប៉ុន្តែយើងពិបាកសន្និដ្ឋានដោយនាវាមួយនេះមានទំហំធំមិនអាចប៉ាន់ស្មានទម្ងន់គ្រឿងយុទ្ធភណ្ឌសរុបក្នុងនាវាបានទេ៕សហការី