បន្ទាយមានជ័យ៖រថយន្តបើកបុកជាមួយម៉ូតូ បណ្តាលឱ្យបុរសម្នាក់ស្លាប់ភ្លាម ហើយតែកុងបានរត់បាត់សមត្ថកិច្ចកំពុងរកចាប់ខ្លួន។ហេតុការណ៍នេះបានកើតឡើងនៅផ្លូវជាតិលេខ៦ ក្នុងឃុំឈ្នួរមានជ័យ ស្រុកព្រះនេត្រព្រះ ខេត្តបន្ទាយមានជ័យ កាលពីយប់ថ្ងៃទី៥ ខែធ្នូ។
មន្ត្រីនគរបាលប៉ុស្តិ៍បានឱ្យដឹងថា បុរសដែលស្លាប់ឈ្មោះ ផល ជុយ អាយុ៣៨ឆ្នាំនៅភូមិ ឃុំខាងលើ បានជិះម៉ូតូម៉ាកហុងដាឌ្រីម ផ្លាកលេខបន្ទាយមានជ័យ1A.3939 ។មុនកើតហេតុជនរងគ្រោះជិះម៉ូតូតាមផ្លូវជាតិលេខ៦ពីកើតទៅលិច។ មកដល់កន្លែងខាងលើបានបុកជាមួយរថយន្តម៉ាកហាយឡេនឌ័រ ផ្លាកលេខភ្នំពេញ2AW.0863 មកពីមុខពេញទំហឹង បណ្តាលឱ្យខាងម៉ូតូស្លាប់មួយរំពេច។
បន្ទាប់ពីមានហេតុការណ៍កើតឡើង កម្លាំងនគរបាលស្រុកបានចុះមកពិនិត្យ និងបញ្ជាក់ថា គ្រោះថ្នាក់ចរាចរណ៍នេះ បង្កដោយរថយន្តបានបើកលឿនរេចង្កូតបុកជាមួយម៉ូតូ បណ្តាលឱ្យស្លាប់ម្នាក់។ក្រោយមកផ្នែកជំនាញបានយករថយន្តនិងម៉ូតូ ទៅទុកនៅអធិការដ្ឋាននគរបាលស្រុកព្រះនេត្រព្រះ ហើយបន្តរកចាប់ខ្លួនតៃកុងរថយន្តបង្ក យកមកអនុវត្តតាមច្បាប់៕
