ខេត្តព្រះវិហារ៖កម្លាំងកងរាជអាវុធហត្ថក្រុងនិងខេត្តព្រះវិហារបានចាប់ជនសង្ស័យម្នាក់ករណីលួចម៉ូតូ។ការចាប់ខ្លួនជននោះបានធ្វើឡើងនៅបន្ទប់ជួលមួយកន្លែងស្ថិតក្នុងភូមិអណ្តូងពោធិ៍ សង្កាត់កំពង់ប្រណាកក្រុង/ខេត្តព្រះវិហារកាលពីថ្ងៃទី១៦កញ្ញាឆ្នាំ២០២០។
លោកវរៈសេនីយ៍ទោជួរប៊ុនសុងមេបញ្ជាការរងទទួលការងារយុត្តិធម៌នៃបញ្ជាការដ្ឋានកងរាជអាវុធហត្ថខេត្តព្រះវិហារបានឱ្យដឹងថាៈក្រោយទទួលបានបទបញ្ជាពីលោកឧត្តមសេនីយ៍ត្រីកងសៅគុណមេបញ្ជាការកងរាជអាវុធហត្ថខេត្ត។លោកបានដឹកនាំកម្លាំងដោយសហការជាមួយអាវុធហត្ថក្រុងព្រះវិហារចុះស្រាវជ្រាវលើករណីចោរកម្មលួចម៉ូតូ១គ្រឿងដែលជនរងគ្រោះបានបាត់កាលពីថ្ងៃទី១កញ្ញាឆ្នាំ២០២០ ស្ថិតនៅក្នុងភូមិភារកិច្ចខាងលិច សង្កាត់ប៉ាលហាល ក្រុង/ខេត្តព្រះវិហារ។
លោកវរៈសេនីយ៍ទោ ជួរ ប៊ុនសុង បានបន្តថា ជនសង្ស័យម្នាក់ដែលត្រូវបានសមត្ថកិច្ច ឃាត់ខ្លួននោះឈ្មោះសុនវណ្ណដាភេទប្រុសអាយុ២៧ឆ្នាំស្នាក់នៅបន្ទប់ផ្ទះជួលមួយកន្លែងស្ថិតនៅក្នុងភូមិអណ្តូងពោធិសង្កាត់កំពង់ប្រណាកក្រុង/ខេត្តព្រះវិហារ។សមត្ថកិច្ចបានរកឃើញនិងដកហូតកុំព្យូទ័រលេបថប១គ្រឿង,ស្ទិកឃ័រ១ឈុត,កាបូបកុំព្យូទ័រ១,សាក់កាដូពណ៌ខ្មៅ១,ខ្សែកកាឡៃ១ឈុតនិងទូរស័ព្ទអាយហ្វូនខូច១គ្រឿង។សម្ភារទាំង៦មុខនេះគឺជារបស់ជនរងគ្រោះដែលបាត់ហើយរកឃើញនៅក្នុងបន្ទប់ជួលរបស់ជនសង្ស័យ។ ចំណែក ថ្នាំ ញៀនប្រភេទម៉ាទឹកកក ១កញ្ចប់តូច, ចង្កឹះសោម៉ូតូ២,កូនសោមួយចំនួន,ស្ទិកឃ័រម៉ាកWowe១ឈុត,សម្លៀកបំពាក់ប៉ារ៉ាយោធា៣កំប្លេ,ដង្កាប់១,ទួលឺវីស៣និងសម្ភារបម្រើឱ្យការប្រព្រឹត្តបទល្មើស មួយចំនួន ទៀត។
លោកវរៈសេនីយ៍ទោ ជួរ ប៊ុនសុង បានបន្តថា នៅចំពោះមុខសមត្ថ កិច្ច ជនសង្ស័យ សុន វណ្ណដា បានឆ្លើយសារភាពកំហុសថាខ្លួនគាត់ពិតជាបានធ្វើសកម្មភាពលួចម៉ូតូម៉ាកឃ្លីកពណ៌ស១គ្រឿងនោះមែន។ក្រោយពីលួចបានហើយគាត់«ជនសង្ស័យ»ក៏បានជិះម៉ូតូនោះយកទៅ បញ្ចាំនៅម្តុំឃ្លាំងរំសេវ រាជធានីភ្នំពេញដោយបញ្ចាំបានក្នុងតម្លៃ៤០០ដុល្លារអាមេរិក។កម្លាំងជំនាញបានកសាងសំណុំរឿងដើម្បីបញ្ជូនជនសង្ស័យទៅតុលាការ៕