កុមារី Parwana Malik អាយុ៩ឆ្នាំ ត្រូវបានឪពុកម្តាយ លក់ទៅឲ្យជនចម្លែកម្នាក់។ នៅថ្ងៃដែល Parwana ត្រូវបានអ្នកទិញឈ្មោះ Qorban យកទៅ ឪពុករបស់នាងឈ្មោះ Abdul Malik បានអង្វរសុំកុំធ្វើបាបកូនរបស់ខ្លួនអី។
ក្រុមគ្រួសាររបស់កុមារី Parwana និយាយថា ពួកគេគ្មានជម្រើសទេ ហើយស្ថិតក្នុងចំណោមគ្រួសារទុរគតជាច្រើន ដែលត្រូវបង្ខំចិត្តលក់កូនស្រីតូចរបស់ពួកគេ ឲ្យរៀបការដើម្បីរស់ ខណៈប្រទេសអាហ្វហ្គានីស្ថាន កាន់តែធ្លាក់ចូលទៅក្នុងវិបត្តិមនុស្សធម៌បន្ថែមទៀត។
លោក Abdul ថា គាត់គ្មានជម្រើសក្រៅពីលក់ Parwana ដើម្បីជួយគ្រួសាររបស់គាត់ឲ្យរស់រានមានជីវិតទេ។ គាត់និយាយថា “យើងមានសមាជិកគ្រួសារប្រាំបីនាក់។ ខ្ញុំត្រូវលក់ដើម្បីរក្សាសមាជិកគ្រួសារផ្សេងទៀតឲ្យនៅរស់”។
Parwana និងគ្រួសាររបស់នាង បានរស់នៅក្នុងជំរំជនភៀសខ្លួនអាហ្វហ្គានីស្ថាននៅខេត្ត Badghis ភាគពាយ័ព្យអស់រយៈពេល ៤ឆ្នាំមកហើយ។ ពួកគេរស់បានដោយសារតែជំនួយមនុស្សធម៌ និងការងារដែលរកប្រាក់បានប្រហែល ២.៧ ដុល្លារក្នុងមួយថ្ងៃ។
ប៉ុន្តែចាប់តាំងពីក្រុមតាលីបង់ ចូលកាន់កាប់អាហ្វហ្គានីស្ថានក្នុងខែសីហាមក សេដ្ឋកិច្ចរបស់ប្រទេសនេះ បានស្ថិតក្នុងដំណាក់កាលដួលរលំ ហើយជំនួយមនុស្សធម៌អន្តរជាតិត្រូវបានផ្អាក៕
